سمعت صوت صراخها والتليفون قطع فجأة. وقفت في الشارع لثواني، قلبي كان بيدق بسرعة، مش خوفاً عليها، لكن لأنني مش هسمح لعادل يضيع نفسه في مشكلة تنهي كل شيء قبل ما آخذ حقي منه ومنها بالقانون.
اتصلت فوراً بالمحامي اللي كان متابع قضيتي، وبلغته بالنص: “أستاذ عادل طالع شقة والدته في حالة غضب شديد وبيهدد طليقته سارة، الحقوهم فوراً قبل ما تحصل مشكلة كبيرة.”
ركبت عربيتي وذهبت على العمارة. لما وصلت، كان الشارع متجمع على صوت الصراخ اللي نازل من الدور التاني. طلعت السلم بسرعة، لقيت باب شقة حماتي مفتوح على آخره، والبيت مكركب، وحماتي واقفة في الزاوية بتصرخ.
عادل كان ماسك قطعة خشب، ورافعها في وش سارة اللي كانت قاعدة تحت الترابيزة، وشها متبهدل وبتبكي. كان بيصرخ فيها بصوت عالي: “خربتي بيتي! ضيعتي مني الشقة والفلوس وحبستيني وجاية دلوقتي تقوليلي ماليش دعوة؟!”
سارة أول ما شافتني داخلة من الباب، جريت عليا وهي بتبكي بانهيار: “الحقيني يا ميار! أرجوكي انقذيني منه!”
بصيت لعادل بثبات، وقلت بصوت ثابت: “نزل اللي في إيدك يا عادل.. مش عشانها، عشان نفسك. لو ضربتها، هتضيع بقية عمرك في مشاكل قانونية، وهي مش تستاهل تضيع ثانية واحدة من حياتك عشانها.”
عادل إيده بدأت ترتعش، وبصلي بعيون مليانة ندم: “ضيعتك يا ميار عشان دي؟ ضيعت البيت والست المحترمة اللي كانت صايناني عشان واحدة مثلت عليا؟!”
قبل ما ينطق حرف تاني، كانت القوة الأمنية وصلت الشقة. الضباط مسكوا عادل وهدّوه، وسحبوه وهو بيصرخ باسمي وبيترجاني أسامحه، وحماتي قعدت على الأرض من الصدمة لما شافت ابنها بيتاخد للمرة التانية.
الظابط بص لسارة وهي بتبكي وطلب منها تحضر القسم لعمل محضر، بس أنا وقفت في النص وقدمت للظابط أوراق صغيرة: “يا فندم، دي شهادة تحركات وسجلات مالية أنا سحبتها الصبح من البنك.. هذه السيدة كانت بتسحب مبالغ مالية من حساب عادل بدون علمه بالاتفاق مع شخص من زمايلها في البنك قبل ما تنفصل عنه أول مرة، وده السبب الحقيقي اللي خلاها ترجع تمثل الحب عليه.”
سارة ملامحها اتجمدت، وعيونها اتسعت برعب! السر اللي كانت فاكراه مدفون طلع للنور.
“الكلام ده صحيح؟” الظابط سألها بصوت صارم. سارة حاولت تجمع نفسها، وبصت لي بغضب وصرخت: “كذب! دي مفبركة الأوراق دي عشان تنتقم مني!”
رديت عليها بثبات وأنا ببتسم ابتسامة هادية: “الموظف اللي كان بيساعدك في السحوبات في البنك تم التحقيق معه من ساعتين، واعترف بكل حاجة بالتفصيل لما اتواجه بكاميرات المراقبة، وذكر اسمك كشريكة في تبديد أموال.. تقدري توضحي للنيابة أصل المبالغ اللي دخلت حسابك في نفس التوقيت؟”
عادل، اللي كان واقف بين العساكر، بص لسارة بذهول صدمة أشد من صدمة الحبس! عيونه كانت هتخرج من مكانها وهو يستوعب إن الست اللي خربت بيته، كانت بتستغله. صرخ فيها بصوت مكتوم ومليان قهر: “كنتي بتسرقيني وبتضحكي عليا؟! يا خاينة!”، وحاول يندفع عليها تاني بس العساكر مسكوه وسحبوه وهو بيعيط وبيصرخ: “سامحيني يا ميار! والله اتعميت!”
الظابط شاور للعسكري: “خد السيدة معانا على القسم.. التهمة كبرت، بقت تهديد وتزوير أوراق رسمية.”
سارة وهي بتتسحب بين إيدين العساكر، المظهر الفخم والغرور اللي كانت داخلة بيه الفرح طاروا تماماً. كانت ماشية بتجر رجليها، شعرها مبهدل، ووشها مليان دموع، وكل ما تبصلي تلاقيني واقفة بثبات. وقفت قصادي لحظة قبل ما تخرج من الباب وقالت بكسرة: “أنا آسفة يا ميار.. أرجوكي تنازلي عن القضايا دي!”
قربت منها بهدوء، وهمست في أذنها بنفس النبرة اللي قالتها لي في العربية وهي بترميني في الظلمة والبرد: “باي يا عروسة.. القانون أدفى من الشارع في الشتاء.”
خرجوا كلهم من الشقة، والشارع اللي كان مليان صريخ هدي فجأة. نزلت على السلم بخطوات واثقة، سبت شقة حماتي مكركبة وحماتي قاعدة على الأرض تبكي على خيبة ابنها. طلعت شقتي الملك، قفلت الباب على نفسي، ولأول مرة حسيت إن كل وجع ودمعة خدت حقها وزيادة.
فتحت الشباك، استنشقت الهواء النظيف، واتصلت بالمحامي عشان نجهز للخطوة الأخيرة.. خطوة قفل الصفحات القديمة للأبد
بعد شهر…
عدى شهر كامل على اليوم ده.. شهر كان كفيل إنه يقلب الحياة تماماً ويرجع كل حاجة لنصابها الصح.
سارة اتحولت للمحاكمة، والتهم حاصرتها من كل اتجاه؛ اختلاس وتزوير أوراق بنكية بالتعاون مع الموظف، غير البلاغ الكاذب والتحريض. أحكام قضائية صدرت ضدها بالسجن 5 سنوات، لتتحول من البنت المغرورة اللي بتلعب بالكل، لسجينة ورا القضبان، بتدفع ثمن كل قهر تسببت فيه
