* يا فندم.. بس هي مراتي والفلوس دي حق بيتي..
الأستاذ سامح قطعه فوراً وضرب بيده على المكتب:
* مرتب الموظف حقه الشخصي بالقانون يا محترم! أنت جاي هنا تقتحم شركة محترمة وتشهر بفرع كامل وبموظفة ممتازة عندنا عشان خلافات أسرية على ميكرويف وتكييف؟ أنت عارف إن الحركة دي ممكن أعملك بيها محضر رد شرف وتعدي على المنشأة وتشهير بموظفة في مكان عملها؟
حماتي كانت فاكرة إن المدير هيطردني أو يبهدلني قدامهم، بس لما لقيت الكلام انقلب عليهم، وقفت وزعقت:
* أنت بتدافع عنها ليه يا أستاذ؟! هي ساحراكم هنا ولا إيه؟ ابني راجل وست سيدها!
الأستاذ سامح رفع سماعة التليفون وبص للأمن اللي واقف على الباب:
* يا أمن.. خدو الأستاذ والست دي بره المبنى فوراً. ولو رجلهم عتبت الشركة تاني اتصلوا بالنجدة فوراً بتهمة اقتحام منشأة والتعدي على الموظفين!
رجال الأمن مسكوا محمود وأمه من دراعهم وسحبوهم لبره وهو بيحاول يتملص ويقول: “أنا صاحب حق! أنا صاحب حق!” وأمه بتصرخ وبتدعي عليا وعلى الشركة وهي نازلة على السلم.
الأستاذ سامح بص لي بعد ما خرجوا، ونهد بتعب وقال:
* عبير.. أنتِ موظفة ممتازة، بس أنا مش هسمح بمهزلة زي دي تتكرر هنا تاني. الخلافات دي تخلص في المحاكم مش في الطرقات. خدي بقية اليوم إجازة روحي ظبطي أمورك.
خرجت من الشركة وأنا ركبي بتخبط في بعضها من شدة الضغط العصبي والإهانة، بس جوايا نار مش هتهدأ. اتصلت بالاستاذ هشام المحامي بتاعي وأنا في الشارع وبحكيله كل كلمة حصلت..
الأستاذ هشام ضحك في التليفون وقال بثقة:
* ممتاز جداً يا مدام عبير! الحركة الغبية اللي عملوها في الشركة دي هي اللي هتقطم رقبتهم في المحكمة! اتجهي فوراً على قسم الشرطة، هنعمل محضر تعرض وتشهير في مكان العمل، وبكره الصبح هنرفع دعوى حبس ببدل النفقة وبلاغ رسمي بالتعدي!
وصلت بيت بابا، وحكيت له اللي حصل في الشركة، بابا كان هيتجنن وكان عايز ينزل يروح لهم الشقة، بس المحامي مسكه وقاله: “سيب اللعب بالقانون يا حاج عبد الله.. الضرب بالقانون بوجع أكتر من الضرب بالإيد”.
عدى يومين، وفي صباح يوم الأربعاء، الباب خبط في بيت حماتي تحت..
محمود فتح الباب، وجد قدامه محضر من المحكمة بيبالغه بإحالة قضية التبديد والشهير للجلسة، ومعاها أمر استدعاء رسمي في محضر التعدي على مكان العمل.. وفي نفس اللحظة، تليفون محمود رن من رقم غريب، لما رد، كان صوت المحامي الأستاذ هشام وهو بيقوله بنبرة هادية ومرعبة:
* أهلاً يا أستاذ محمود.. حبيت أبلغك إن العرض اللي عرضناه عليك للحل الودي اتلغى تماماً بعد حركة الشركة، ومن بكرة الصبح.. المحكمة هي اللي هتتكلم.
