العربية النص نقل الشيالين الهدوء اللي كان بيكلمني بيه الصبح وهو لابس بدلته!
متتعبيش نفسك يا نور وتنزلي خلصي اللي وراكي في البيت واستنيني.
الكلب!
كان مجهز كل حاجة!
كان عايز يلبسني تهمة العقم ويطلقني غيابي أو يجيب عليا ضرة، وفي نفس الوقت يسرق شقتي وينقل عفشها ويبيع حاجتي كلها، عشان لما أرجع ألاقي نفسي في الشارع على البلاطة!
كان عايز يكسرني من كل النواحي يكسر أنوثتي، ويكسر ضهري المادي، ويجردني من شقايا وشقا أهلي!
خالتي أم أحمد! اسمعيني كويس! خشي شقتك واقفي ورا الباب، ومتخليش حد يقرب من العمارة، وأنا خمس دقايق وهكون عندك بالشرطة!
قفلت المكالمة من غير ما أستنى ردها.
جريت على أول الشارع، وشاورت لأول تاكسي معدي، ركبت ورزعت الباب ورايا وقلت للسواق بنبرة قطعت كل نقاش
على فيصل يا أسطى، أقصى سرعة عندك، وحياة والديك بيتي بيتسرق!
السواق لما شاف وشي وشاف الهستيريا اللي في عيني، مداسش فرامل، غرز بنزين وطار بالعربية بين العربيات.
طول الطريق، وأنا قاعدة ضامة إيديا الاتنين، ودماغي بتغلي زي المرجل.
كنت بفتكر كل يوم عشته في البيت ده.
افتكرت لما أبويا الله يرحمه اداني قرشين الدهب بتوعه وقالي يا نور، البيت ده سندك، الراجل مهما كان حبيب، قرشك هو ضهرك، أوعي تكتبي طوبة منه باسم حد.
وفعلاً، الشقة كانت في عقد مسجل باسمي، بس العفش؟ العفش كله بفواتيره اللي باسمي كانت محطوطة في درج السرير!
يا ترى لحق يوصل للدرج ده؟ يا ترى أخد الورق؟
الدهب غوايش أمي وسلسلتها اللي مكنش حيلتي غيرهم ذكرى منها بعد ما راحت، كنت حطاهم في علبة خشب متبطنة بمخمل في قعر الدولاب.
مش هسيبك تاخد قشاية واحدة يا حسام ورحمة أبويا اللي نزل تحت التراب ما هسيبك تتهنى بمليم مني!
التاكسي وصل مدخل الشارع بتاعنا بعد تلت ساعة كانت أطول من خمس سنين جوازي.
نزلت من التاكسي ورميت للسواق الفلوس من غير ما أستنى الباقي، وجريت في الشارع.
الشارع كان هادي نسبياً بسبب إن الوقت اتأخر، بس قدام مدخل عمارتنا كان المشهد يشيب الرأس.
عربية نص نقل جامبو واقفة بالعرض وسادة نص الطريق.
على صندوق العربية، كان محطوط تلاجتي ال ١٨ قدم متغلفة بكرتون مقطع، والغسالة الفول أوتوماتيك اللي كنت دافعة دم قلبي في أقساطها، والصالون المدهب بتاعي اللي نقيته قماشة قماشة كان مترصص فوق بعضه برعونة كأنه شوية كراكيب!
واتنين رجالة بدراعات مفتولة ولابسين جلابيب مقطعة، كانوا نازلين من باب العمارة شايلين طربيزة السفرة الرخام!
دمي فار في عروقي.
صرخت صرخة شقت سكون الشارع كله
نزّل الطربيزة دي منك له يا حرامي إنت وهو!!
نزلوا الحاااجة!!
الرجالة وقفوا مذهولين، وبصوا لبعض وبصوا لي.
واحد فيهم حط طرف الطربيزة على الأرض ومسح عرقه بكُم جلابيته وقال ببرود
جرى إيه يا ست إنتِ؟ حرامية مين وعفاريت مين؟ المعلم حسام مأجرنا ننقل العفش ده لمخزن في إمبابة، ومقاولنا على نقلة البيت كله، وسيبيلنا نفسنا عشان نخلص قبل الفجر!
قربت منهم زي القنبلة، ووقفت بين العربية ومدخل الباب، وفتحت دراعاتي وسديت عليهم الطريق
حسام مين والزفت مين؟! أنا صاحبة الشقة وصاحبة العفش ده! واللي هيمد إيده على حاجة تانية هكسرهاله هنا!
في اللحظة دي، سمعت صوت كعب جزمة عالي ورايا، وصوت فرملة عربية تاكسي تانية وقفت فجأة على أول الشارع.
الباب اتفتح، ونزل منه حسام بس مكنش لوحده.
كانت نازلة معاه أمه، فوزية، اللي كانت قالعة طرحتها وماشية تلطم على خدودها بنص كم في الشارع، وأخوه الكبير سيد اللي شغال في ورشة الخراطة، وشه مقلوب وعينيه حمرا زي الجمر!
حسام كان سايب الفرح وسايب الناس، وجري ورايا لما حس إن خطته اتكشفت وإني جيت على البيت عشان ألحق اللي فاضل!
فوزية أول ما شافتني، زعقت وصوتها جاب آخر الشارع
يا مصيبتي السودة! البت الڤاجرة اهي! الحقي يا حارة، الحقي يا دنيا! جاية تقف في وش ابننا وتمنعه من حقه!
سيد، أخو حسام، قرب عليا بخطوات تقيلة، راجل ضخم وجته عريضة، شاور بصباعه الخشن في وشي وقال بنبرة تهديد صريحة
شوفي يا بت الناس، إحنا لحد دلوقتي عاملين حساب للأصول والنسب اللي بيننا. العفش ده طالع يعني طالع، وحسام بيصفي حسابه معاكي عشان خلاص ملكيش عيش في العيلة دي بعد الفضيحة اللي عملتيها في القاعة. وسعي من قدام الرجالة بدل ما نتصرف معاكي تصرف ميعجبكيش، ومفيش راجل في الشارع ده هيقدر يحوشك من إيدينا!
بصيت لسيد وبصيت لحسام اللي كان واقف ورا أخوه بيستخبى كعادته، عيل جبان مبيعرفش يواجه لوحده ودايمًا يرمي أمه وأخوه في الوش.
قلت لسيد وصوتي أهدى من الموت، بس نبرته ترعب
اتصرف يا سيد وريني هتعمل إيه! مد إيدك كده على ست في وسط الشارع عشان تتسحب في قضية بلطجة وسرقة بالإكراه مع أخوك!
وبعدين بصيت لحسام وصرخت فيه
الدهب فين يا حسام؟! دهب أمي اللي كان في الدولاب راح فين؟!
حسام عينه زاغت، وبص في الأرض، ومردش.
بس فوزية هي اللي ردت بمنتهى البجاحة والغل
دهب مين يا أم دهب؟! هو إنتِ كان حيلتك دهب أصلًا؟! ده ابني صرف دم قلبه عليكي وعلى عملياتك اللي ملهاش لازمة عشان تعالجي بطنك العاقر! ده حق تعبه وشقاه، والدهب ده اتباح وراح في سداد مصاريفك إنتِ!
الكلمة كانت كف على وشي، بس في نفس الوقت كانت القشة اللي قسمت ضهرهم.
هما مكنوش بس بينقلوا العفش هما كسروا الدولاب وسرقوا الدهب كمان!
وفجأة، قبل ما أرد ولا أتحرك، سمعت صوت سرينة شرطة جاية من بعيد.
الصوت كان بيقرب بسرعة، والأنوار الزرقا والحمرا بدأت تضرب في حيطان العمارات بتاعة الشارع.
وش حسام اتخطف للمرة التانية في نفس الليلة.
وسيد اتلفت برعب وبص لأخوه وقال له
يخرب بيتك! الشرطة جاية ليه؟! إنت مش قولت لي إنك متفق معاها وكل حاجة وديّة؟!
أنا مكنتش لسه طلبت النجدة في التاكسي بس مين اللي طلبها؟
بصيت لفوق، لقيت بلكونة الدور التالت مفتوحة، وخالتي أم أحمد واقفة فيها ومعاها ابنها الكبير أحمد، ماسك تليفونه في إيده وبيديني إشارة براسه كأنه بيقولي متقلقيش يا نور، حقك مش هيضيع.
البوكس وقف وراه عربية نجدة تانية، ونزل منهم ضابط برتبة نقيب، معاه أمين شرطة واتنين عساكر شايلين بنادقهم.
الضابط نزل، بص على المنظر، وبص على العفش اللي فوق العربية، وبص للشارع الملموم
خير يا جماعة؟ في إيه هنا؟ مين اللي كاسر شقة ومطلع عفش في وقت متأخر كده؟!
