الكلمة نزلت في ودني زي مية متلجة في عز كيهك.
المصيبة اللي أنا محضرها لك في البيت دلوقتي!
مسكته لدراعي كانت بتضغط على عضمي، بس الوجع اللي في دراعي مكنش يجي ربع الضربة اللي خبطت في دماغي.
الراجل اللي قدامي ده مش بس واحد غادر أو ناكر جميل، ده حد شايل كمية سواد وغل لو اتفرقت على بلد بحالها تغرقها.
نفضت إيدي من بين صوابعه بعنف، ورجعت خطوة لورا، وبصيت في عينيه بنظرة محتقرة خليته يبلع ريقه تاني
بيتي اللي حيلتي وحيلة أبويا الله يرحمه؟ البيت اللي باسمي وشارياه بقرش ورثي قبل ما عتبة رجلك تدخله؟ ناوي تعمل فيه إيه يا حسام؟ تحرقه؟!
حسام ماردش، بس شفايفه ارتعشت
بابتسامة صفرا مسمومة، وعينيه لمعت بنظرة غدر مريضة، كأنه بيقولي أعلى ما في خيلك اركبيه.
في اللحظة دي، القاعة كانت خلاص خرجت عن السيطرة.
المعازيم اللي كانوا جايين ياكلوا جاتوه ويسقفوا، بقوا واقفين صفوف، وكل اتنين تلاتة ماسكين سيرة البيت من أوله لآخره.
أم العريس التاني، اللي هي أم البنت اللي أخو حسام لسه كاتب كتابه عليها، وقفت في نص القاعة وشها أصفر من الفضيحة، وصوتها جلجل فوق أصوات الناس كلها
جرى إيه يا ست فوزية؟! إحنا ناس محترمين وبناتنا مش لعبة في إيديكوا! إيه الكلام الماسخ والتقارير الطبية والمشاكل اللي داخلين عليها دي؟! إحنا كاتبين كتاب بتنا على ابنك الصغير ولسه رجلينا مدبتش في بيتكم، نلاقي الفضايح دي في وشنا؟!
حماتي لفت وشها، وبقت عاملة زي الفرخة الدايخة، مش عارفة تلحق على مين ولا مين.
تبص لأهل عروسة ابنها الصغير تترجاهم، ولا تبص لابنها الكبير اللي اتعرا في نص الصالة، ولا تبص لبنت أختها اللي قعدت على الكرسي حاطة إيدها على وشها وبتعيط بحرقة من الإحراج وخيبة الأمل.
قربت فوزية من أم العروسة الجديدة ورفعت إيديها الاتنين كأنها بتستجدي الشفقة
حقك عليا يا أم نسمة! وحياة الغاليين دي غيرة حريم ونور دي مجنونة ومش على عقلها، والورقة دي مزورة وحسام راجل سيد الرجالة، دا كيد نسا والله كيد نسا! متكسريش فرحة الواد الصغير بذنب ما ارتكبوش!
كيد نسا؟!
الصوت طلع مني مجلجل، قطعت بيه كلامها قبل ما تلف وتدور على الناس. شيلت الشنطة على كتفي، وقربت من ترابيزة المأذون، اللي كان بيقفل شنطته الجلد السودا ووشه جايب ألوان من اللي شافه وسمعه.
بصيت للشيخ وقلت له
يا مولانا، الورقة دي قدامك أهي ومختومة، وأنا بنسحب بأدبي ومش هسمح لنفسي أفضل ثانية واحدة على ذمة واحد دلس عليا وباعني برة وجوة، بس قبل ما أمشي، حسام هينطق يمين طلاقي قدام الكل زي ما كان عايز يشهر جوازته التانية قدام الكل.
حسام قرب مني ووشه محتقن بالدم لدرجة إن عروق رقبته كانت هتفرقع، وقال بصوت فحيحه طالع من تحت أسنانه
طلاق مش هطلق! بمزاجي وبإرادتي مفيش طلاق! هسيبك متعلقة زي البيت الوقف، تلفي حوالين نفسك في المحاكم وتدفعي دم قلبك على المحامين! وروحي يلا بقى شوفي بيتك وشوفي عزالك اللي فرحانة بيه! اطلعي اجري شوفي مستقبلك يا هانم!
الجملة التانية دي رنت في قلبي بجرس إنذار مرعب.
روحي شوفي بيتك وشوفي عزالك!
مفتاح الشقة!
أنا نزلت وسيبت البيت مستعجلة، لكن حسام نزل قبلي بساعتين كاملين ساعتين كان يقدر يعمل فيهم بلاوي، وهو معاه نسخة من المفاتيح، وأمه كمان معاها نسخة!
في ثانية واحدة، حسيت إن الواقفة هنا مضيعة للوقت.
الفضيحة أخدت مجراها، وكرامتي اللي كانوا عايزين يمسحوا بيها الأرض، رفعتها فوق روسهم كلهم، والتقرير الطبي بقى في إيد المأذون والناس كلها شافته وعرفته، وبنت خالته شافت بعينها الخدعة اللي كانت هتتدبس فيها.
كده تمام الباقي حسابات قانونية ملهاش لازمة تتقال قدام معازيم.
لفيت ضهري واديتهم قفايا، ومشيت بخطوات واسعة وريحة كبريائي سابقة رجلي.
نور! اقفي هنا لما أكلمك! متخرجيش من القاعة دي إلا لما نتفاهم!
صوت حسام كان بينادي ورايا بغيظ، وخطواته السريعة بدأت تقرب مني، لكن قبل ما يوصل لباب الخروج، كان خال العروسة الجديدة راجل صعيدي بدقن بيضا ومبين عليه الهيبة، وقف في وشه وحط إيده في صدر حسام ورجعه خطوتين لورا
عيب عليك يا واد سيب الست تمشي بحالها، وبدل ما تجري ورا مرا ضربتك في مقتلك، اقف هنا رد على أسئلتنا وفهّمنا إيه القطرانة السودة اللي إنت وأمك مدخلين عيلتنا فيها دي!
ده كان آخر صوت سمعته من جوة القاعة.
خرجت للشارع.
الهوا الساقع خبط في وشي، حسيت كأني كنت في أوضة مفيهاش أكسجين وفجأة طلعت للنور.
نفسي كان طالع نازل بسرعة رهيبة، ورجلي كانت بتترعش ارتعاشة مكتومة مش خوف، دي رعدة الصدمة بعد ما بتعدي ويسيبك الجسم يواجه الواقع.
طلعت تليفوني من الشنطة عشان أطلب تاكسي، بس لقيت شاشة الموبايل منورة بعشر مكالمات فايتة من رقم أم أحمد، جارتي في الدور التالت اللي تحت شقتي بالظبط.
قلبي وقع في رجلي.
أم أحمد ست طيبة وفي حالها، وعمرها ما رنت عليا إلا لو فيه مصيبة واقعة أو ماسورة مية ضاربة.
دوست على زرار الاتصال وإيدي بتترجف، والخط فتح من أول رنة
ألو! يا نور! إنتِ فين يا بنتي حسبي الله ونعم الوكيل؟!
صوت أم أحمد كان بينهج، وخلفية المكالمة فيها صوت دوشة وخبط تقيل كأن فيه هدد بيحصل.
رديت بصوت مقطوع
أنا في الشارع يا خالتي أم أحمد في إيه عندكوا؟! إيه الخبط ده؟!
إلحقي يا بنتي شقتك! حسام من الصبح بدري، قبل ما ينزل الفرح بساعة، جاب عربية نص نقل وتلات رجالة شيالين شكلهم يخوف، وفتحوا الشقة وقاعدين ينزلوا في العفش والأجهزة من بعد العصر! ولما سألته وأنا نازلة على السلم قال لي بننقل عشان نور رايحة شقة جديدة أوسع وبنجدد العفش! بس الرجالة نازلين يكسروا وينهبوا يا بنتي، وحتى دهب أمك اللي كان في الدولاب، ربنا يستر عليه!
الدنيا لفت بيا في الدايرة كلها.
